NJC’s nittartagaanut tikilluarit
Nordisk Journalistcenterip (NJC’p) suliassaraa nunat avannarliit ataqatigiinnerat kulturikkullu ataqatigiinnerat tusagassiuutini soqutigineqalersissallugu, soqutiginninnerlu ataavartinniassallugu. NJC’p apeqqutit tusagassiornermut, politikimut, aningaasarsiornermut, inooqatigiinnermut kulturimullu tunngasut nunanut avannarlernut soqutiginartunngorlugit sammisarpai.
Taamaattumik pikkorissarnerit, isumasioqatigiinnerit allallu ilisimasaqarnermik qaffassaasinnaasut Sverigemi, Norgemi, Danmarkimi, Finlandimi, Islandimi, namminersornerulerfiusunilu, Kalaallit Nunaanni, Savalimmiuni Ålandillu Qeqertaanni tusagassiortunut aaqqissuuttarpai.Aaqqissuussisarnitsinni suleqatigiinnitsinnilu nunat avannarliit oqaasii ajornanngiffiatigut atorneqaqartarput. Ilisarititsineq una Finlandimiutut, Islandimiutut, kalaallisut Savalimmiormiutullu (kisiartaalluni) nutserneqaraluartoq, taamaattoq svenskisut, norskisut qallunaatulluunniit pisinnaasaqarnissaq pisariaqarpoq NJC’p pikkorissartitsineri tamakkiisumik pissarsiffigissagaanni. Pikkorissarnerimmi tamarmik “nunat avannarlermiusut” ingerlanniarneqartarput – ilaanni oqartarpugut “blandinavisk” (skandinavisk allanngulaarlugu), tassami NJC-mi pikkorissaasut piumaffigisarpagut tamanut paasiuminartunik oqaluttaqqullugit, ilaannilu nunat sanilerisat oqaasiinik akoorusisaqqullugit.
Pikkorissartut namminneq oqaatsit tungaasigut tunniussaqartarnissaat pingaartutut aamma isigisarparput, tassami pikkorissartitsisarnitsinni pingaarnertut anguniarneqartarmat tusagassiortut avannarlermiut oqaloqatigiinnermikkut, misilittakkaminnik tunniusseqatigiittarnermikkut ilisimasanillu paarlaasseqatiginnermikkut suleqatigiissinnaassasut.
Siunertaavoq tusagassiortunik Nunat Avannarliit kulturikkut politikikkullu immikkoortuunerannik ataatsimoorfeqarnerannilllu paasinnilluartunik, taamatullu nunat avannarliit Europami nunarsuarmioqatigiinnermilu inissisimanerannik takunnissinnaasunik peqarnissaq peqartuarnissarlu.
NJC Nunat Avannarliit Ministeriisa Siunnersuisoqatigiiffiata ataani suliniutaavoq, piffissamilu 2007-imiit 2009-mut Update – Center for journalistisk kompetenceudviklingimit aqunneqarluni. Update Danmarks Medie- og Journalisthøjskolemi Århusimiittumi inissisimavoq, NJC-lli pikkorissartitsisarneri isumasioqatigiissitsinerilu nunarsurmi sumiluunniit ingerlanneqarsinnaapput, sammisaq nunanut avannarlernut tunngappat naammalluni.
